今朝去翠華食個早餐，諗住嘆個豬仔包，加杯熱奶茶，食飽滿滿足足返去開個死人RI會。
係二樓卡位坐低無耐，身邊圓桌來了一家三口。個男人污污糟糟，油頭垢面，一大個啤酒肚，著住條短打加涼鞋，豬肉佬嘅標準；個女人呢，又肥又矮，一頭凌亂長髮似「鴉烏婆」，惡眉惡眼面目猙獰，未坐低，就大大聲鬧個仔：「你同我行好啲得唔得，邊有人行得你咁衰！」個細路呢，可能仲細，睇上去正正常常，不過左耳有隻耳環。
佢地坐低，個細路都未坐好，個女人大大聲鬧：「你同我坐好啲啦！咪郁來郁去！」
個細路坐好，佢地睇餐牌，細路想食公仔麵，個女人又鬧：「食乜差公仔麵！你尋日咪食咗囉！食食食，食咁多公仔麵食死你！」
個男人唔覺意，細細聲講咗句：「佢尋日邊有食公仔麵......」
個女人即刻雙倍大聲，目露凶光，怒啤男人連珠炮發：「我同佢尋日食下午茶佢咪食咗囉！你果陣係唔係到呀？你見唔見到呀？見唔到又係到出聲！唔通我係到屈佢唔俾佢食公仔都咩？你有無用腦架？你當我死架？」
男人即刻低頭扮睇餐牌，死狗無聲出。
之後全程都係個女人不停鬧兩仔爺，不停鬧，而且眼神仲充滿怨恨，好似想殺咗佢地兩個，好似全世界欠咗佢。
我完全控制唔到自己，一邊食我嘅早餐，一邊偷望佢地，對個細路寄予無限同情，好難想像佢係咁嘅環境，對住個咁嘅阿媽，會點成長。越聽個女人把聲，越感到煩厭同憤怒，臨走時好有衝動起身過去，捉住條肥婆講：「八婆你收嗲啦！」然後一個餐包塞住佢個豬嘴再踢佢落樓梯。
至於果個男人，唉......唔好提，簡直係地球上所有雄性生物之恥辱。
